ფერის ფსიქოლოგია ინტერიერის დიზაინის ის მნიშვნელოვანი მხარე, რომელიც ოთახის ხასიათს აყალიბებს. ფერები ადამიანებში სხვადასხვა ემოციებს აღძრავენ, ამიტომ მათი შერჩევისას, პირველ რიგში, მნიშვნელოვანია იმ ატმოსფეროს განსაზღვრა, რომლის შექმნაც გსურთ. 

მწვანე ფერი:

ადამიანებისთვის მწვანე ფერი ბუნებასთან ასოცირდება.

ადამიანის გონება ბუნებას სიმშვიდეს, სიახლესა და ნდობას უკავშირებს.

მისი სხვადასხვა ელფერი ხელს უწყობს მოდუნებას, აღძრავს უსაფრთხოების განცდას და ამცირებს ჰიპერტენზიისა და არტერიული წნევის დონეს. 

ინტერიერის დიზაინში მწვანე ფერი ხშირად გამოიყენება. ეს ფერი ბუნებასთან სიახლოვის განცდას აჩენს, რაც ადამიანის ფიზიკურ და მენტალურ ჯანმრთელობაზე დადებითად მოქმედებს. ამავდროულად მწვანე ინტერიერს აცოცხლებს და მასში მრავალფეროვნება შემოაქვს. მნიშვნელობა არ აქვს, ღია ფერი იქნება ის თუ მუქი, მწვანე ფერის პალიტრაში თქვენთვის სასურველი ტონალობა აუცილებლად მოიძებნება. 

მწვანე ფერი უხდება, როგორც თანამედროვე სტილს, ასევე კლასიკურ სტილსაც, მთავარია მისი ზომიერად გამოყენება.

ღრმა ზურმუხტისფერი განსაკუთრებულად ელეგანტურია ინტერიერში, ხოლო ღია მწვანე ასტიმულირებს შემოქმედებითობას და გეხმარება კონცენტრირებაში. ის იდეალური ფერია კედლებისთვის ისეთ სივრცეებში სადაც საჭიროა გონების გახსნა. მწვანე ფერის გამოყენება რეკომენდებულია სამუშაო ოთახსა და სამზარეულოში.